Noss mund da professiuns: quai tschertgain nus

Noss mund è probablamain in dals pli multifars insumma. Perquai tschertgain nus talents e collavuraturas e collavuraturs engaschads da las pli differentas gruppas professiunalas. Plinavant scolain nus sezs talents e purschain plazzas d'emprendissadi per l'entrada en la professiun.

"Radio Rumantsch", "Telesguard", "Minisguard", “Cuntrasts” u Battaporta? Tar RTR datti diversas funcziuns publicisticas en differentas redacziuns. Sco schurnalista u schurnalist elavurais Vus infurmaziuns tar artitgels online, furmas radiofonicas u material da video; vus retschertgais e publitgais ils temas en la furma adattada. Vus raquintais istorgias u declerais curt e concis schabetgs cumplitgads che fatschentan il mund. Vus essas di per di vid la funtauna da l’infurmaziun, essas en gir sco reporter u reportra. Sco producenta u producent essas Vus responsabel per l’emissiun dal di u per la concepziun da l’emissiun.

Sco moderatura u moderatur dais Vus la vusch e/u la fatscha a l’emissiun. Vus essas in talent da communitgar e n’avais naginas retegnientschas da numnar directamain las chaussas. Vus moderais en il studio u al lieu, la gronda part capita quai live.

RTR porscha fitg bunas pussaivladads da scolaziun per giuvnas e giuvens cun interess e talent schurnalistic.

Ils profils professiunals principals tar RTR èn

  • redacturA (TV, radio, online)
  • moderatorA (TV, radio)
  • producentA (TV, radio, online)
  • video-schurnalistA (TV, online)
  • redacturA social media
  • redacturA musica
  • redacturA regiunalA (TV, radio, online)

En ina chasa da media audiovisuala datti ina massa tecnica. Ina pitschna squadra cun savida fitg specifica garantescha mintga di - per part ensemen cun ils collegas da la SRG SSR - ch'il Radio Rumantsch va sur l'emettur, che las emissiuns da televisiun vegnan emessas ord il studio a Cuira, che tut ils computers e las raits funcziunan, ch'ils studios regiunals èn equipadas endretg etc

Ils champs da lavur principals en la partiziun tecnica dad RTR èn

    • producziun tv / video
    • producziun radio / audio
    • informatica
    • engineering
    • webmastering

       


     

    Collavuraturas e collavuraturs motivads ed engaschads èn la premissa per products audiovisuals d'auta qualitad. Quai pretenda da mintgin e mintgina in engaschi cun grond entusiassem era en ils champs da lavur dal support e da l'administraziun.

    In ambient modern ed innovativ promova in schurnalissem d'auta qualitad. Per che quel possia sa sviluppar, planisain ed administrain nus l'interpresa RTR.

     

     

    Ils champs da lavur principals dals servetschs da support e da l’administraziun èn

    • marketing, communicaziun, relaziuns publicas
    • finanzas, controlling
    • human resources, scolaziun e furmaziun

    Praticum e stage

    RTR porscha bunas pussaivladads da scolaziun per giuvnas e giuvens cun interess e talent schurnalistic. Els han la pussaivladad d’absolver durant max. 6 mais in praticum schurnalistic e da far suenter in stage cun frequentar la scola al MAZ (2 onns).

    Il praticum schurnalistic tar radio u multimedia s’adressa ad absolventas ed absolvents d’in emprendissadi, da la matura gimnasiala u professiunala u d'ina scolaziun equivalenta. Suenter datti la pussaivladad da frequentar ina scolaziun supplementara en direcziun schurnalissem. La finamira dal praticum è d’emprender d'enconuscher la chasa da medias RTR e las differentas lavurs schurnalisticas.

    In praticum dura per regla 6 mais e cumpiglia ina part da la scolaziun da basa interna. El vegn organisà dal post da scolaziun e furmaziun. Quel garantescha in accumpagnament professiunal durant il temp d’introducziun tras il tutoriat.

    Annunzia per in praticum

    Cundiziuns per in praticum u stage

    • vegliadetgna min. 18 onns
    • emprendissadi, matura gimnasiala u professiunala, studi u scolaziun equivalenta
    • bunas enconuschientschas d’in idiom rumantsch, d’avantatg experientscha schurnalistica
    • participaziun ad in ‘lavuratori far medias’ tar RTR
    • lavurar a temp cumplain
    • flexibilitad areguard il temp da lavur (fins d’emna, dis da festa).

    RTR porscha pussaivladads da scolaziun per giuvnas e giuvens cun interess e talent en il sectur audio/video. Quellas persunas han la pussaivladad d'absolver durant max. 6 mais in praticum tecnic e suenter tenor cunvegna in stage accumpogna d'ina scola superiura durant 2 onns.

    Il praticum tecnic sa drizza ad absolventas ed absolvents d’in emprendissadi d’informatica, electronica da multimedia u d’ina scolaziun equivalenta che prendan en mira la pussaivladad da sa scolar enavant en direcziun audio/video. La finamira è d’emprender a conuscher la chasa da medias RTR e las differentas lavurs en la partiziun tecnica.

    Annunzia per in praticum

    In praticum dura per regla 1-3 mais e cumpiglia ina part da la scolaziun da basa interna. El vegn organisà dal post da scolaziun e furmaziun ensemen cun il responsabel dal sectur pertutgà e vegn coordinà da la dispo tecnica. Quai garantescha in accumpagnament professiunal durant tut il temp dal praticum.

    Candidatas e candidats cun la finamira da far in stage sco tecnicistA dal tun u da video vegnan era sustegnids en la preparaziun per l’examen d’admissiun per las scolas TTS/Tontechnikerschule, Schönenwerd, ffton/Freie Fachschule für Tontechnik, Zürich u SAE/Institut SAE, Turitg.

    Cundiziuns

    per in praticum:

    • vegliadetgna min. 19 onns
    • emprendissadi tecnic sche pussaivel cun matura professiunala u scolaziun ni savida equivalenta e d’avantatg cun experientscha da lavur
    • bunas enconuschientschas d’in idiom rumantsch
    • lavurar a temp cumplain
    • flexibilitad areguard il temp da lavur (fins d’emna, firads)

    per in stage:

    • avair fatg in praticum tecnic en chasa RTR
    • contract da stage tar RTR
    • disposiziun d'admissiun d’ina scola (TTS, ffton, SAE)
    • lavurar a temp cumplain e flexibilitad areguard il temp da lavur (fins d’emna, firads)

     

     


    Lavuratori FAR MEDIAS

    Il lavuratori dat a persunas che vulan far in praticum u che s'interessan per ina plazza la pussaivladad d'emprender a conuscher la chasa RTR. La finamira è da far ina contribuziun per radio u in film per multimedia, da sclerir dumondas persunalas e da sa recumandar sco futurA collavuraturA.

    Annunzia per lavuratori FAR MEDIAS

    Cundiziuns

    • vegliadetgna almain 18 onns
    • min. 4 / max. 8 participantas e participants
    • il lavuratori far medias è gratuit
    • annunzia giavischada fin il pli tard duas emnas avant il lavuratori

    Uffants/giuvenils e medias

    RTR avra las portas ad uffants e giuvenils. Cun diversas purschidas pon uffants e giuvenils (da 6 enfin 18 onns) guardar davos las culissas d’ina chasa da medias.

    Dapli chattais Vus qua.

    Purschidas per uffants

    • Guidas atras la chasa
    • Di dal Futur
    • Scriver è cool
    • Pass da vacanzas
    • FIUTSCHER 2018
    • Fufragnadi schurnalissem - emprendissadi da prova
    • Fufragnadi mercantil / informatica - emprendissadi da prova

    Emprendissadis e fufragnadi

    Durant l'emprendissadi da commerzi che dura 3 onns lavuran las emprendistas ed ils emprendists en tut las partiziuns administrativas da RTR. Sper la lavur pratica en fatschenta visitan ellas ed els dus dis l'emna la scola a Cuira ubain a Glion.

    RTR publitgescha mintgamai avant la stad l’inserat per la plazza d’emprendissadi da l’onn sisur. Tgi che vul esser infurmà automaticamain cura che l’inserat è publitgà po s’inscriver per il job-abo.

    Survista

    • Durada: 3 onns
    • Profil: E ubain M (cun matura professiunala)
    • Branscha: servetschs ed administraziun
    • Scola professiunala: scola d'economia Cuira ubain Center da formaziun Surselva
    • Lieu da lavur: Cuira
    • Diplom da finiziun: attestat federal da qualificaziun sco «commerzianta/commerziant AFQ» (Kauffrau/Kaufmann EFZ)

    Informaticras ed informatichers cun attest federal da qualificaziun (AFQ) realiseschan, installeschan, examineschan e tgiran soluziuns d’informatica. RTR porscha l’emprendissadi en il sectur “tecnica da sistems”.

    Broschura informaticher/cra AFQ

    Annunzia per fufragnadi

    Fufragnadi - l'emprendissadi da prova. Ina purschida per futurAs emprendistAs u collavuraturAs.

    Avais vus gust da lavurar tar RTR?

    RTR porscha fufragnadis per giuvnas e giuvens che vulan far in emprendissadi mercantil u l'emprendissadi d'informatica. Plinavant vala la purschida da fufragnadi era per persunas che han interess d’emprender ad enconuscher la lavur schurnalistica u tecnica ma era per persunas cun l’opziun da vegnir a lavurar tar RTR.

    Annunzia per fufragnadi

    Pretensiuns per in fufragnadi

    • bunas enconuschientschas d’in idiom rumantsch en scrit ed a bucca
    • per il fufragnadi mercantil u informatica: a partir da la 2. classa dal stgalim superiur
    • per il fufragnadi schurnalistic u tecnic: absolvì ina furmaziun professiunala u ina scola media e sche pussaivel experientscha da lavur
    • durada: 1 fin max. 5 dis

    Dapli infurmaziuns tar mes univers per 360°!