Noss mund da professiuns: quai tschertgain nus

Radio RTR, Telesguard, Minisguard, Cuntrasts u RTR musica? Tar RTR datti diversas funcziuns publicisticas en differentas redacziuns. Sco schurnalista u schurnalist elavurais Vus infurmaziuns tar artitgels online, furmas radiofonicas u material da video; vus retschertgais e publitgais ils temas en la furma adattada. Vus raquintais istorgias u declerais curt e concis schabetgs cumplitgads che fatschentan il mund. Vus essas di per di vid la funtauna da l’infurmaziun, essas en gir sco reporter u reportra. Sco producenta u producent essas Vus responsabel per l’emissiun dal di u per la concepziun da l’emissiun. 

Sco moderatura u moderatur dais Vus la vusch e/u la fatscha a l’emissiun. Vus essas in talent da communitgar e n’avais naginas retegnientschas da numnar directamain las chaussas. Vus moderais en il studio u al lieu, la gronda part capita live. 

RTR porscha fitg bunas pussaivladads da scolaziun per giuvnas e giuvens cun interess e talent schurnalistic.

Ils profils professiunals principals èn

• redacturA (TV, radio, online)
• moderaturA (TV, radio)
• producentA (TV, radio, online)
• video-schurnalistA (TV, online)
• redacturA social media
• redacturA musica
• redacturA regiunalA (TV, radio, online)

En ina chasa da media audiovisuala datti ina massa tecnica. Ina pitschna squadra cun savida fitg specifica garantescha mintga di - per part ensemen cun ils e las collegas da la SRG SSR - ch'il Radio RTR va sur l'emettur, che las emissiuns da televisiun vegnan emessas ord il studio a Cuira, che tut ils computers e las raits funcziunan, ch'ils studios regiunals èn equipadas endretg etc.

Ils champs da lavur principals èn

• producziun tv / video
• producziun radio / audio
• informatica
• engineering
• webmastering

Collavuraturas e collavuraturs motivadAs ed engaschadAs èn la premissa per products audiovisuals d'auta qualitad. Quai pretenda da mintgin e mintgina in engaschi cun grond entusiassem era en ils champs da lavur dal support e da l'administraziun. 

In ambient modern ed innovativ promova in schurnalissem d'auta qualitad. Per che quel possia sa sviluppar, planisain ed administrain nus l'interpresa RTR.

Ils champs da lavur principals èn

• marketing, communicaziun, relaziuns publicas 
• finanzas, controlling 
• human resources 
• servetschs da support sco disposiziun da persunal, datas ed archiv, funcziuns da stab 

Es ti sin la tschertga da tia futura plazza? RTR porscha fufragnadis per giuvnas e giuvens che vulan far in emprendissadi mercantil/commerzial u l'emprendissadi d'informatica.  
Annunzia per fufragnadi - ubain directamain per e-mail a daniel.wasescha(at)rtr.ch.

RTR publitgescha mintgamai avant la stad l’inserat per la plazza d’emprendissadi da l’onn sisur. Tgi che vul esser infurmà automaticamain cura che l’inserat è publitgà po s’inscriver per il job-abo.

Cundiziuns

• frequentar la 2. u 3. classa dal stgalim superiur
• bunas enconuschientschas d’in idiom rumantsch a bucca (ed en scrit)
• durada: 1 fin 3 dis 

Tge far? Ti fas in emprendissadi u la scola media, tschertgas ina nova sfida professiunala ubain has da frequentar in praticum curt da scola? La lavur en ina chasa da medias t’interessa, dentant plascha ella er? Ed has ti las abilitads? Emprova tia fortuna e visita nus!

En 1 di fin 2 emnas, tut tenor tes temp e tia veglia e tenor tes giavisch pos ti emprender d’enconuscher RTR – nus chattain lura il termin ed organisain la visita. Ti survegns in’invista en ils differents champs redacziunals sco radio, televisiun, social ni era en nossa IT, communicaziun, marketing u administraziun.

In sguard avant e davos las culissas pos ti dar ubain en nossa chasa principala a Cuira ubain en in da noss studios regiunals en la Surselva, en il Surses u en l’Engiadina.

Ti pos gugent t’annunziar u tar martina.werro(at)rtr.ch (tutora) ubain daniel.wasescha(at)rtr.ch (responsabel resursas umanas)

Cundiziuns

• vegliadetgna a partir da 16 onns
• senza paja

Vulessas ti daventar schurnalista u schurnalist? Ubain far ina lavur da tecnicist u tecnicista?

Has ti mirveglias ed es ti gugent là nua che las chaussas capitan - t’interessas per la Rumantschia, il Grischun, il mund - lavuras ti gugent cun la lingua, purtrets e tun ubain la tecnica?

Nus sustegnain e scolain tai!

Ti pos frequentar tar nus in praticum da 2 fin 6 mais.

En quest temp emprendas ti d’enconuscher la branscha da medias e nossa chasa cun sias vastas purschidas. Gia davent da l’entschatta fas ti part dal team e pos ta sviluppar en la pratica cun sustegn e scolaziuns internas.

Suenter quest praticum pudess tes viadi schurnalistic cuntinuar tar RTR cun in stage da 2 onns cumbinà cun la scolaziun schurnalistica al MAZ, la scola da medias a Lucerna. Sco tecnicistA pudess tia via cuntinuar cun la scolaziun “digital film production diploma” a la SAE a Turitg.

Has ti ulteriuras dumondas? Nus respundain gugent ellas! 

T’annunzia tar martina.werro(at)rtr.ch (tutora) u daniel.wasescha(at)rtr.ch (responsabel resursas umanas)

Annunzia per in praticum - ubain directamain per e-mail a daniel.wasescha(at)rtr.ch

Cundiziuns per in praticum u stage

• Vegliadetgna: da circa 18 onns fin 30+
• Scolaziun: emprendissadi, matura gimnasiala u professiunala, studi u scolaziun equivalenta
• Salari: a partir da CHF 2'500 per mais

• Durada: da minimum 2 fin maximum 6 mais

Il mund da lavur tar RTR è fitg varià. Vuls ti dar in’egliada e guardar sche la lavur en il schurnalissem fiss insatge per tai? Alura è il lavuratori far medias tia schanza! In entir di sas ti far experientschas al microfon, cun la camera ed era guardar davos las culissas da RTR.

Nus ans legrain sin tai!

Dumondas? Ubain gust e betg peda quest di? Alura scriva a martina.werro(at)rtr.ch (tutora)

Annunzia per lavuratori FAR MEDIAS - ubain directamain per e-mail a daniel.wasescha(at)rtr.ch

Cundiziuns

• Ti has gust, mirveglias ed as minimum 17 onns vegl
• Il lavuratori ha lieu duas giadas l’onn, mintgamai ina sonda la primavaira e l’atun
• Participaziun da minimum 3 persunas
• Il lavuratori è gratuit
• Annunzia giavischada fin il pli tard 10 dis avant il lavuratori