Nossas offertas
Mes univers per 360° cumpiglia incumbensas satisfaschantas ed in ambient interessant. Sco patruna cun responsabladad sociala porscha la SSR a ses collavuraturs plinavant in pachet cumplessiv fair che sa cumpona da numerusas prestaziuns supplementaras*.
Work-Life-Balance
Telelavur / Work smart
La SSR sustegna e promova la lavur mobila flexibla ed independenta dal lieu. Uschia pon ils collavuraturs organisar lur lavur a moda flexibla ed individuala. Quai pretenda atgna responsabladad e promova a medem temp la qualitad da viver, la creativitad, la productivitad e la forza innovativa.
La SSR è cuninizianta e partenaria da l'iniziativa Work Smart.
Lavurar a temp parzial
Lavurar a temp parzial è da princip pussaivel tar la SSR e vegn promovì conscientamain; er per il cader. Tar la SSR lavura passa la mesadad dals collavuraturs a temp parzial.
Jobsharing
RTR porscha la pussaivladad da parter la plazza. Duas u pliras persunas partan ina plazza da 100%.
Temp da lavur / vacanzas
Il temp da lavur tar la SRG SSR importa - cun ina plazza a temp cumplain - 40 uras l'emna. Nus avain il model da lavur annual (Jahresarbeitszeit).
Tar RTR datti 27 dis da vacanzas. Cun 50 onns datti 32 dis e sur 55 onns 37 dis da vacanzas.
Congedi da maternitad / paternitad
Collavuraturas e collavuraturs da la SRG SSR profiteschan d’in congedi da maternitad da 18 emnas respectivamain in congedi da paternitad da 4 emnas. Per ils geniturs da la medema schlattaina exista er in dretg da survegnir 4 emnas congedi. Ultra da quai han collavuraturas e collavuraturs tar la naschientscha u tar l'adopziun d'in uffant il dretg da sbassar il grad d'occupaziun sin 60 pertschient.
Tgira d'uffants
Las collavuraturas ed ils collavuraturs pon dumandar contribuziuns per la tgira ordvart la famiglia da lur uffants.
Sanadad
Management da sanadad en il manaschi
RTR dat gronda paisa a la segirezza a la lavur e protegia la sanadad da collavuraturas e collavuraturs, grazia ad in management da sanadad professiunal.
Diversitad ed inclusiun
RTR tschertga activamain la diversitad sin tut ils stgalims – collavuraturas e collavuraturs da tut las regiuns, da tut las vegliadetgnas e derivanzas. Nus ans engaschain activamain per in bun equiliber tranter um e dunna – oravant tut era en funcziuns da manar. Respect e stima vicendaivla èn pitgas fundamentalas da nossa collavuraziun. Nus promovain activamain la chapientscha vicendaivla da collavuraturas e collavuraturs entaifer noss'organisaziun.
Co capita quai tar RTR?
- Eterogenitad è in enritgiment en il mintgadi da lavur
- Nossa cultura da discussiun è constructiva e sa basa sin respect
- Nus creain ina convivenza a moda averta ed integrativa
- Mintgina e mintgin ha il spazi liber basegnaivel
- Noss focus mettain nus sin las fermezzas professiunalas ed umanas
- Nus vivain l’egualitad da dunna ed um en la sistematica da paja, en decisiuns ed en il program.
Ulteriurs infurmaziuns sa chattan qua.
Scolaziun e perfecziunament
Nossas collavuraturas e noss collavuraturs èn noss factur da success il pli impurtant. Perquai mettain nus paisa sin ina purschida attractiva da pussaivladads da scolaziun e da furmaziun supplementara professiunala e persunala. Il svilup dal persunal da RTR cumpiglia mesiras da promoziun sco il svilup individual da la carriera, furmaziuns supplementaras internas ed externas sco er ulteriuras mesiras da svilup che mantegnan e sviluppeschan las abilitads e las cumpetenzas da noss persunal. Il sectur da la scolaziun e da la furmaziun tar RTR stgaffescha cundiziuns generalas optimalas per sustegnair l’emprender individual. Sco valur directiva stattan a disposiziun a noss persunal 5 dis per onn chalendar per scolaziuns e furmaziuns supplementaras.
La SSR or d'ina autra perspectiva
Il program da barat intern da la SSR permetta a nossas collavuraturas e noss collavuraturs d'emprender d'enconuscher nossa unitad d'interpresa or d'ina nova perspectiva; saja quai en in'autra partiziun u en in'autra regiun linguistica.
Promoziun da talents
La SRG SSR vul scuvrir, promover e nizzegiar ils talents individuals e las fermezzas persunalas da collavuraturas e collavuraturs. Per quest intent realisescha la SRG SSR annualmain in program per sviluppar talents. Il program è ina purschida flexibla da moduls e da tools che las participantas ed ils participants pon metter ensemen individualmain. Mintga talent ha in auter punct da partenza e va sin in agen viadi da svilup.
Paja ed assicuranzas
Paja
Nossa salarisaziun è orientada a las pretaisas, a la prestaziun ed al martgà da lavur. Per collavuraturas e collavuraturs cun paja mensila exista da princip la pussaivladad da transfurmar la 13avla paja mensila dal tuttafatg u per part en in congedi.
Assicuranzas
Las collavuraturas ed ils collavuraturs da la SRG SSR èn assicuradAs cunter accidents professiunals e nunprofessiunals sco er cunter las consequenzas economicas da la vegliadetgna, da la mort e da l'invaliditad tenor las disposiziuns legalas ed il reglament da prevenziun da la cassa da pensiun SRG SSR.
(*Las prestaziuns da standard valan per collavuraturs cun CCL, en cas da cundiziuns d'engaschament pon las prestaziun eventualmain divergiar.)
Ans suandai era sin: